Dvādaśo'dhikāraḥ
Technical Details
dvādaśo'dhikāraḥ
dharmadeśanāyāṃ mātsaryapratiṣedhe ślokaḥ|
prāṇānbhogāṃśca dhīrāḥ pramuditamanasaḥ kṛcchralabdhānasārān|
satvebhyo duḥkhitebhyaḥ satatamavasṛjantyuccadānaprakāraiḥ|
prāgevodāradharmaṃ hitakaramasakṛtsarvathaiva prajānāṃ
kṛcchre naivopalabdhaṃ bhṛśamavasṛjatāṃ vṛddhigaṃ cāvyayaṃ ca||1||
dharmo naiva ca deśito bhagavatā pratyātmayavedyo yata
ākṛṣṭā janatā ca yukta[yukti]vihitairdharmaiḥ svarkī dharmatāṃ
svaśāntyāsyapuṭe viśuddhivipule sādhāraṇe 'thākṣaye
lāleneva kṛpātmabhistvajagaraprakhyaiḥ samāpāditā||2||
tasmānnaiva nirarthikā bhavati sā yā bhāvanā yogināṃ
tasmānnaiva nirarthikā bhavati sā yā deśanā saugatī|
dṛṣṭo'rthaḥ śrutamātrakādyadi bhavet syādbhāvanāpārthikā
aśrutvā yadi bhāvanāmanuviśet syāddeśanāpārthikā||3||
āgamato adhigamato vibhutvato deśanāgrasatvānāṃ|
mukhato rūpātsarvā[rvataā]kāśāduccaraṇatā'pi............||4||
viṣadā saṃdehajahā ādeyā tatvadarśikā dvividhā|
saṃpannadeśaneyaṃ vijñeyaṃ[yā] bodhisattvānāṃ||5||
madhurā madavyapetā na ca khinnā deśanāgrasatvānāṃ|
sphuṭacitrayuktagamikā nirāmiṣā sarvagā caiva||6||
adīnā madhurā sūktā pratītā viṣadā tathā [vāgjinātmaje]|
[yathārhā nirābhiṣā ca parimitākṣayā tathā]||7||
uddeśānnirdeśāttathaiva yānānulomanāt ślākṣṇyāt|
prātītyadyāthārhānnairyāṇyādānukūlyatvāt||8||
vyañjanasaṃpaccaiṣā vijñeyā sarvathāgrasattvānāṃ|
ṣaṣṭyaṅgī sācintyā ghoṣo 'nantastu sugatānāṃ||9||
vācā padaiḥ suyuktairanudeśavibhāgasaṃśayacchedaiḥ|
bahulīkārānugatā hyuddhaṭitavipañcitajñeṣu||10||
śuddhā trimaṇḍalena hiteyaṃ deśanā hi buddhānāṃ|
doṣairvivarjitā punaraṣṭabhireṣaiva vijñeyā||11||
kauśīdyamanavabodho hyavakāśasyākṛtirhyanītatvam|
saṃdehasyācchedastadvigamasyādṛḍhīkaraṇam||12||
khedo'tha matsaritvaṃ doṣā hyete matā kathāyāṃ hi|
tadabhāvādbuddhānāṃ nirūttarā deśanā bhavati||13||
kalyāṇo dharmo'yaṃ hetutvādbhaktituṣṭibuddhīnāṃ|
dvividhārthaḥ sugrāhyaścaturguṇabrahmacaryavadaḥ||14||
parairasādhāraṇayogakevalaṃ tridhātukakleśavihānipūrakam|
svabhāvaśuddhaṃ malaśuddhitaśca taccaturguṇabrahmavicaryamiṣyate|| 15||
avatāraṇasaṃdhiśca saṃdhirlakṣaṇato 'paraḥ|
pratipakṣābhisaṃdhiśca saṃdhiḥ pariṇatāvapi||16||
śrāvakeṣu svabhāveṣu doṣāṇāṃ vinaye tathā|
abhidhānasya gāmbhīrye saṃdhireṣa caturvidhaḥ||17||
asāre sāramatayo viparyāse ca susthitāḥ|
kleśena ca susaṃkliṣṭā labhante bodhimuktamāṃ|| iti||
samatā 'rthāntare jñeyastathā kālāntare punaḥ|
pudgalasyāśaye caiva abhiprāyaścaturvidhaḥ||18||
buddhe dharme 'vajñā kauśīdyaṃ tuṣṭiralpamātreṇa|
rāge māne caritaṃ kaukṛtaṃ cāniyatabhedaḥ||19||
sattvānāmāvaraṇaṃ tatpratipakṣo 'grayānasaṃbhāṣā|
sarvāntarāyadoṣaprahāṇameṣāṃ tato bhavati||20||
yo granthato 'rthato vā gāthādvayadhāraṇe prayujyeta|
sa hi daśavidhamanuśaṃsaṃ labhate satvottamo dhīmān||21||
kṛtsnāṃ ca dhātupuṣṭiṃ prāmodyaṃ cottamaṃ maraṇakāle|
janma ca yathābhikāmaṃ jātismaratāṃ ca sarvatra||22||
buddhaiśca samavadhānaṃ tebhyaḥ śravaṇaṃ tathāgrayānasya|
adhimuktiṃ saha buddhyā dvayamukhatāmāśubodhiṃ ca||23||
iti suga[ma]tirakhedavān kṛpāluḥ prathitayaśāḥ suvidhijñatāmupetaḥ|
bhavati sukathiko hi bodhisattvastapati jane kathitairyathaiva sūryaḥ||24||
|| mahāyānasūtrālaṃkāre deśanādhikāro dvādaśaḥ||